雖然已把談判延長了3天，但加拿大和美國的關稅談判週五深夜依然以破裂告終，美國貿易談判代表格里爾（Jamieson Greer，右照片）在美加東岸時間週五晚上11點半向記者表示，加拿大不願在本週較早時兩國同意的條款下同意貿易協議最終細節。美國官員透露，早前華府警告向200億美元加拿大進口實施的新關稅會隨即在東岸時間週六凌晨零時1分生效。
美國總統侵侵禮拜二朝早準備出發去北約峰會前，被記者問及以色列同伊朗同意停火冇幾耐就又再互相空襲，侵侵鬧爆兩邊都違反停火，話「佢哋唔知自己做緊乜L嘢」。
侵侵答咗記者一啲問題，最後咁講：「你哋知唔知呀？宜家有兩個國家，佢哋打咗好耐，打得好勁，打到佢哋唔知自己做緊乜L嘢（what the fuck they're doing）。你哋明唔明呀？」然後，佢轉身行向架飛機度。
（英文原文：You know what? We basically have two countries that have been fighting so long and so hard that they don't know what the fuck they're doing. Do you understand that?）
截圖嚟自Fox新聞台影片，喺侵侵講「fuck」嘅一刻。
侵侵似乎特別唔滿意以色列。佢話，佢覺得兩邊都違反咗停火，唔知佢哋係唔係特登咁做，佢話佢唔鍾意以色列今朝又攻擊，佢會睇吓可唔可以制止到佢哋。
侵侵鬧以色列鬧多啲，鬧以色列喺各方一達成協議，就即刻出嚟係咁掟炸彈，係之前未見過咗重型嘅炸彈，係(近期)最大嘅導彈，佢唔滿意以色列。
侵侵稍為詳細咁講：「當我話『OK，你有12個鐘頭(去準備停火)』，你唔係真係第一個鐘頭就出嚟，向佢哋(伊朗)掟晒你手頭上有嘅(炸彈)㗎嘛，所以我唔滿意佢哋(以色列)。」
侵侵有話佢都唔滿意伊朗，但強調佢真係好唔高興以色列今朝出嚟炸伊朗，只係因為一支未着陸嘅火箭炮，支火箭炮可能唔覺意射咗出嚟，都冇着陸到，咁就去炸返伊朗，佢好唔滿意呢一點。
記者又有問伊朗啲核設施係唔係摧毀晒，侵侵話係，話伊朗永遠都唔會重建得返核計劃。佢又讚賞幾名機師完成咗難以置信嘅任務，話個時好夜，好黑，冇月光，但佢哋都可以擊中目標；佢仲乘機鬧啲新聞台，特別是CNN。
侵侵話，CNN「係咁喺度話『呀，我都同意已經破壞咗，但又唔係破壞得咁徹底』」，佢鬧CNN呢啲咁嘅講法真係好傷個啲偉大嘅機師嘅心，話啲機師冒住自己生命危險，應該承認佢哋有功。
侵侵仲鬧CNN係「人渣」，MSNBC都係，全部都係假新聞，話啲有線台係無膽輸家，話佢哋要向班機師道歉。佢鬧CNN係一班冇膽嘅人，又點名鬧MSNBC母公司Comcast嘅CEO Brian Roberts，話佢係一個好弱、好可憐嘅羞恥。
=====
如果想支持網主更新本blog、Twitter、Facebook等平台，並閱讀深度分析文章，歡迎訂閱我的Patreon，月費只是7.21美元：