雖然已把談判延長了3天，但加拿大和美國的關稅談判週五深夜依然以破裂告終，美國貿易談判代表格里爾（Jamieson Greer，右照片）在美加東岸時間週五晚上11點半向記者表示，加拿大不願在本週較早時兩國同意的條款下同意貿易協議最終細節。美國官員透露，早前華府警告向200億美元加拿大進口實施的新關稅會隨即在東岸時間週六凌晨零時1分生效。
英國呢幾日經歷咗歷嚟最熱嘅5月天氣，但英格蘭東南根德（Kent）地區差唔多已經成個禮拜都出現有大批居民冇水用嘅情況，其中坎特伯雷市（Canterbury）嘅海邊城鎮 Whitstable 最嚴重，負責向根德地區供水嘅公司「東南水務」（SEW）表示，呢個鎮同附近其他地區到禮拜五仲係有成17,665座物業供水暫停、水壓太低或者供水時有時冇。SEW 解釋，天氣炎熱，令用水需求增加，導致供水出現故障。
Whitstable 居民應該主要係喺禮拜三開始冇水用，但有住戶上個禮拜六就已經開始冇水。SEW 表示，Whitstable 鎮禮拜四晚已經有大概3500個客戶恢復供水，但仲係有3500個客戶到禮拜五仍未恢復供水，預期可以喺禮拜五較後時間重新向呢啲客戶供水。
但係，公司代表話，週末期間，呢個地區全部客戶嘅供水都仲係會斷斷續續，供應唔穩定，又話如果居民用水又突然飆升，咁供水就會再出問題，希望用戶繼續慳啲用水。
SEW 話，呢幾日供水有問題期間，已經向根德地區居民派咗差唔多34萬樽樽裝水。
但 Whitstable 鎮居民好不滿，有啲居民嬲到喺禮拜五朝早集體去咗海度沖涼同刷牙，戴住浴帽，攞埋膠鴨仔抗議，表達不滿。
Whitstable 有一位經營飛髮舖嘅女士向 BBC 講，佢要取消晒禮拜四全部預約，因為佢唔可以用樽裝水幫染髮嘅客人去色。佢仲話，全個鎮嘅商業活動都畀供水問題搞亂晒，佢揸車喺個鎮兜咗個圈，見到好多舖頭都閂門，遊客想去幫襯餐廳同咖啡店，但冇一間食肆開門。
鎮中心一間 Tapas 餐廳嘅老闆講，原本諗住呢個禮拜好full，成個禮拜有數以百計嘅人book咗枱，但餐廳營運禮拜三晚突然停止，因為水喉冇水。佢話，雖然餐廳禮拜五已經有返水，但仲係好擔心，因為SEW講明，週末期間供水仲係會斷斷續續，如果嚟緊一兩日又冇水，咁餐廳就要再度閂門。
根德地區係喺上個禮拜六開始有城鎮供水暫停，最初係 Charing、Challock 同 Molash呢3條村有問題，800戶受影響，呢啲村莊喺3日後嘅禮拜二恢復正常，但之後又到其他村莊同城鎮受影響，除咗Whitstable，仲有 Maidstone 同 Ashford。
除咗根德，鄰近嘅修適士地區（Sussex）都有村鎮出現供水問題。
負責向倫敦地區供水嘅水公司泰晤士水務（Thames Water）禮拜五亦都呼籲用戶節約用水，建議暫時唔好用淋花嘅水管，暫停或減少大量用水嘅活動，亦最好喺繁忙時間減少用水。泰晤士水務話，幾百萬用戶只要每人都作出少少改變，就可以喺炎熱嘅天氣下大大降低供水嘅壓力。
=====
如果想支持網主更新本blog、Twitter、Facebook等平台，並閱讀深度分析文章，歡迎訂閱我的Patreon，月費只是7.21美元：