歐洲 星期二發生7宗客機「詐彈」驚魂，7班航班收到炸彈恐嚇 ，經調查後全部證實為虛假報案，找不到任何可疑物品。暫時未有明確證據顯示這些案件有關連，但各國執法部門正合作，評估是否有人協調發出多宗炸彈恐嚇，擾亂歐洲航空交通。
英國司法部禮拜日公佈英格蘭同威爾斯司法改革，提出畀法官更大權力，可以判限制罪犯人身自由，例如罰唔准落pub、唔准去演唱會同唔准睇波，等法官唔一定要判囚犯坐監，解決監倉太迫嘅問題。
其他人身自由限制懲罰仲包括：唔准揸車、唔准旅行、以及限制只准喺特定地區行動。英國法院宜家已經可以作出類似懲罰，英國政府稱之為「社區服刑」（community sentence），全部唔使坐監嘅刑事罪行懲罰都係「社區服刑」，例如社會服務令。不過，除咗社會服務令，其他「社區服刑」嘅適用範圍有限，例如喺球場睇波時犯事嘅話就會被禁止入場睇波，最新方案將適用範圍擴大。
呢份建議喺今年5月由保守黨籍嘅前司法大臣郭達瑋（David Gauke）寫落，工黨政府宜家準備9月開始落實，展開修例工作。
司法大臣馬曼婷（Shabana Mahmood）話，最新方案有助減少罪案，改善治安。佢話，喺社區接受懲罰嘅人應該被同時限制人身自由，提醒犯事者，犯法要付出代價。
政府喺聲明中又話，工黨上台後一年多，已經增加咗監倉位置，懲教人手亦多咗，並利用AI等新科技，減輕懲教嘅行政工作量，等佢哋有更多時間監督最危險嘅罪犯，務求監獄一定有位囚禁危險罪犯。
有前法官向BBC話，改革方向正確，但效果好唔好，視乎有冇足夠資金作出支援，而且執行前有冇深思熟慮。例如，唔准罪犯落pub，變咗pub嘅員工幫你執法，加重咗佢哋嘅工作量，呢名前法官話，要諗方法點樣去捉啲違反裁決嘅人、以及捉到後點樣懲罰。
夜店業人士話，政府應該同業界商討點樣執行，表示夜店、演唱會表演場所、pub等等嘅場所已經經營艱難，新方案唔公平咁將責任放落佢哋個度。
=====
如果想支持網主更新本blog、Twitter、Facebook等平台，並閱讀深度分析文章，歡迎訂閱我的Patreon，月費只是7.21美元：