阿根廷總統米雷（Javier Milei）繼續就福克蘭群島（Falklands）問題向英國施壓， 雜誌《經濟學人》最新一期刊登了米雷的專訪 ，他建議英國採取「香港模式」，一如英中兩國在有共識下1997年和平移交香港主權給中國，阿英兩國也可達成共識，以便英國把馬爾維納斯群島（Malvinas，阿根廷的稱呼）「歸還」給阿根廷。
《金融時報》禮拜五發佈咗英國薄餅連鎖集團 Domino's UK 嘅 CEO Andrew Rennie 嘅專訪，Rennie 話，由於預測英國薄餅市場接近飽和，所以公司近日開咗炸雞品牌 Chick 'N' Dip，認為市場仲未滿足到英國人對炸雞嘅需求。
Domino's UK 喺全英國同愛爾蘭有1400間分店，喺當中大概200間同時設有 Chick 'N' Dip，宜家考慮緊全國分店都推出。3件炸雞柳賣4.5鎊，8件無骨雞或炸雞翼賣7.5鎊。
Rennie 講，大家嘅飲食習慣有少少變咗，英國薄餅市場冇乜再增長嘅空間，而放眼全球，雞係銷售增長最快嘅蛋白質來源食物，所以 Domino's UK 推出炸雞產品，好理所當然。
FT 指出，全英國薄餅店經營環境都唔係咁好，Domino's UK 喺7-9月嘅落單數目跌咗1.5%，Pizza Hut 喺英國閂咗68間分店，Papa John's 今年8月有74間舖頭結業。喺英國掛牌嘅 Domino's UK 股價今年跌42.5%，跌到去超過10年新低，而且很多投資者沽空呢隻股票。
相比之下，英國炸雞市場迅速增長，無論係KFC呢啲舊品牌，抑或係 Popeyes 同 Wingstop 呢啲新啲公司，業務都健康增長。Rennie 相信雞肉市場唔會咁快見頂，因為牛肉越嚟越貴，雞肉比較之下就抵啲，而且好多健康專家都話要吸收多啲蛋白質。
Rennie 話，煮雞同整pizza都係用緊分店裏面相同嘅設施，可以用埋午膳時間嘅閒置產能，希望多咗炸雞呢個選擇後，可以吸引顧客多啲幫襯。
雖然講到好似好新，但係利物浦報章 Liverpool Echo 喺9月發佈過一篇食評，評論一般。個筆者試食咗之後話，唔係話 Chick 'N' Dip 啲炸雞唔好食，但 Domino's UK 個menu其實一路都有炸雞，宜家之不過係將呢款產品升格到變成一個子品牌。
篇食評話，唔覺得多咗個新子品牌後，啲炸雞同 Domino's 以往啲雞有咩好唔同，亦都唔好 expect 會同對手有好大唔同。佢覺得唔使咁大期待特登買嚟試吓，但 Chick 'N' Dip 確實有好多款醬汁慢慢玩，而且本身都食開 Domino's 嘅話，每次買炸雞試吓唔同醬汁有唔同口味，都係有啲驚喜。
=====
如果想支持網主更新本blog、Twitter、Facebook等平台，並閱讀深度分析文章，歡迎訂閱我的Patreon，月費只是7.21美元：