阿根廷總統米雷（Javier Milei）繼續就福克蘭群島（Falklands）問題向英國施壓， 雜誌《經濟學人》最新一期刊登了米雷的專訪 ，他建議英國採取「香港模式」，一如英中兩國在有共識下1997年和平移交香港主權給中國，阿英兩國也可達成共識，以便英國把馬爾維納斯群島（Malvinas，阿根廷的稱呼）「歸還」給阿根廷。
香港人好多年嚟都將去日本旅行叫做「返鄉下」，因為好多人成日去日本，次數多到好似返鄉下咁，但係日本政府觀光局禮拜三公佈嘅9月訪日旅客人數統計顯示，香港人訪日人數連續第5個月下跌，今年9個月有7個月按年下跌，今年累積計比舊年同期少咗7.6%，跌到去182.27萬人次。唔通香港人唔再「思鄉」？
尤其係香港嘅情況同日本整體外國人觀光統計背道而馳，對比就更鮮明。觀光局話，今年累計訪日外國旅客人次係3165萬左右，比舊年同期多咗17.7%，係歷嚟最快突破3000萬大關嘅一年，應該會超越舊年全年數字3687萬左右。
大部份主要市場嘅訪日人數都上升，就算係中國大陸，2023年重新開關後，因為中日關係唔好而令中國人訪日人數偏低，但今年情況都大大改善，9月訪日人次大概77.55萬，按年升咗18.9%，今年9個月累計數字更加係暴升42.7%，去到748.72萬人次。
另一個主要市場台灣9月有52.7萬人次訪日，按年升12%，今年累積有503.67萬人次訪日，比舊年同期高咗9.8%。
觀光局嘅每月新聞稿都會對每個主要市場寫幾句，簡單講吓市場情況，試吓解釋點解多咗/少咗人嚟日本。9月嘅報告話，訪日港人人次149,500，按年跌咗12.2%，對香港嘅描述係咁寫：「除咗目前正處於（香港）訪日需求下降嘅時期，颱風16號（塔巴）同颱風18號（樺加沙）影響到航班取消，以及中秋舊年喺9月中、今年喺10月上旬，呢啲因素都令到香港訪日人數比舊年同期少咗。」
不妨再睇吓今年其餘8個月，觀光局點樣解釋港人遊日狀況。
8月：人次226,100，按年跌8.3%
雖然正值學校假期，但日本會有地震嘅講法喺社交媒體係咁傳開去，而且8月中旬有颱風接近香港，影響到航班，搞到香港訪日人數比舊年同期少咗。
7月：人次176,000，按年跌36.9%
雖然有學校假期，但日本會有地震嘅講法喺社交媒體係咁傳開去，而且7月中旬有颱風接近香港，影響到航班，搞到香港訪日人數比舊年同期少咗。
6月：人次166,800，按年跌-33.4%
雖然有學校假期同其他（有利）因素，但日本會有地震嘅講法喺社交媒體係咁傳開去，搞到香港訪日人數比舊年同期少咗。
5月：人次193,100，按年跌11.2%
雖然5月上旬有勞動節假期，但日本會有地震嘅講法喺社交媒體係咁傳開去，搞到香港訪日人數比舊年同期少咗。
4月：人次263,600，按年升42.9%
香港新增直飛小松嘅航線，直飛石垣島嘅航線復航，飛關西嘅航班多咗，而且有清明節假期，舊年喺3月嘅復活節假期今年喺4月中旬，都令香港訪日人數比舊年同期多咗。
3月：人次208,400，按年跌9.9%
雖然同舊年同期比，由於多咗航班，包括地方航線航班多咗，所以機位多咗，但係舊年喺3月嘅復活節假期今年喺4月中旬，搞到香港訪日人數比舊年同期少咗。
2月：人次195,500，按年跌5%
雖然同舊年同期比，由於多咗航班，包括地方航線航班都多咗，所以機位多咗，但係舊年喺2月中旬嘅舊曆新年假期今年喺1月下旬，搞到香港訪日人數比舊年同期少咗。
1月：人次243,700，按年升30.8%
除咗因為有1月下旬開始嘅舊曆新年，呢個月多咗航班，包括地方航線航班都多咗，令機位比舊年同期多咗，令香港訪日人次錄得歷來最高嘅1月數字。
=====
如果想支持網主更新本blog、Twitter、Facebook等平台，並閱讀深度分析文章，歡迎訂閱我的Patreon，月費只是7.21美元：