第76屆柏林影展週六公佈了各個獎項得主， 其中最高榮譽金熊獎由德國籍土耳其裔導演 Ilker Catak 執導的德國/土耳其/法國電影Yellow Letters（暫譯《黃色的信》）奪得 。Catak 之前已憑2023年電影《權鬥教員室》（The Teachers' Lounge）獲得美國奧斯卡最佳國際電影提名。
【註：反正這篇文章即使用香港書面語書寫，當中最重要的3個詞語的香港用語都是其他中文地區不相通的——士多啤梨（草莓）、忌廉（鮮奶油）、三文治（三明治），那麼，就用廣東話寫吧】
英國馬莎近日推出限量版士多啤梨忌廉三文治，盛惠2.8英鎊，喺當地引起唔少回響，好多分店好快賣晒，馬莎話係佢哋近日最賣得嘅產品。英國人覺得三文治係鹹食，但同甜味嘅士多啤梨擺埋一齊，味道竟然唔錯喎，所以佢哋覺得好新鮮。
馬莎呢款產品叫做「限量版紅鑽石士多啤梨忌廉三文治」（Red Diamond Strawberry & Creme Sandwich），根據佢哋宣傳嘅介紹，呢款三文治受日本嘅甜味三文治（sweet sandos）啟發，馬莎嘅產品開發人員一直夢寐以求想推出甜品三文治。馬莎話，無論係戶外午餐、屋企飲下午茶、夏天野餐、做運動休息時食個小食充電、又或者下晝想食啲嘢提神，呢款三文治都好適合你喺夏天放縱一下。
雖然可以當甜品食，但呢款三文治會同其他鹹味三文治擺埋一齊，馬莎叫大家唔好去錯甜品部搵。
英國唔係冇得食水果三文治，英國都有日式麵包舖，呢啲專門舖頭一早就有賣呢種食物，但唔係成行成市，而且喺馬莎呢種面向大眾嘅主流舖頭有得賣就係第一次，所以佢哋出士多啤梨忌廉三文治好哄動。
《每日郵報》話，啲網民好like呢款新嘅三文治，有人話10分滿分，佢要畀10萬分，又有人話呢個係隨時隨地都食到嘅蛋糕。
要明白英國人點睇士多啤梨忌廉三文治，先要理解一下「士多啤梨忌廉」同「三文治」喺英國嘅歷史。《每日郵報》略略提及前者，英國有一款好出名嘅甜品——士多啤梨忌廉，喺隻碟或者喺個兜度放啲士多啤梨，然後加啲忌廉，源於中古時期嘅都鐸時期（1485-1603），英王亨利八世（1509-1547年在任）皇家宴會有呢款食物。
去到維多利亞時期（1837-1901），士多啤梨忌廉成為任何庭園party嘅必備食物，而且係溫布頓網球賽嘅名物，一講到現場睇溫布頓，英國人會聯想到呢款甜品。舊時冇冷藏技術，蔬果要當造先有得食，士多啤梨喺英國要喺4月底至7月初嘅春末初夏先有收成、有得食，喺以前嘅英國文學同藝術作品，描述夏天通常會出現呢種食物。溫布頓喺19世紀就開始舉辦，當時英國仍然有夏天先有得食士多啤梨忌廉嘅概念，所以溫布頓同士多啤梨忌廉好有關係，呢種傳統維持到宜家，即使宜家全年都食到士多啤梨。
報紙食評專欄當然有寫呢款食物。《每日電訊報》食評專欄作家 Xanthe Clay 話，佢望落有啲擔心，但食完後話好好味，口感好似甜品，但又冇蛋糕呢啲真正嘅甜品咁甜、咁多糖，每100gram含接近10克嘅糖，比起馬莎煙肉生菜蕃茄三文治（BLT）多 6 gram，但比起一小份海綿蛋糕少 8 gram ，佢覺得與其繼續英式傳統忌廉茶點下午茶（cream tea），不如試忌廉三文治。
The I 嘅食物專欄作家 Sophie Morris 話，佢原本以為馬莎只係出啲噱頭嘢，但食完後覺得好好味，如果有啲靚嘅伴碟，你話呢個係高級蛋糕店出品，佢都會信。Morris 話，雖然已經寫明係士多啤梨同忌廉，但食之前硬係覺得三文治一定係鹹，所以當入口後係甜嘅、多汁，個種味覺嘅快感真係無與倫比。
Morris 喺篇文章引述推出過食譜書籍嘅旅英日本美食家 Makiko Sano，佢喺自己個IG話，畀馬莎呢款三文治滿分。Sano 話，身為日本人，跟日本水果三文治比較，馬莎嘅產品唯一美中不足係冇切走啲麵包皮，佢話喺日本，正宗水果三文治一定要冇麵包皮，但喺另外3樣日本水果三文治一定要做到嘅嘢——咁pat忌廉唔能夠太甜、麵包要加啲甜味、以及水果要夠份量，Sano 話馬莎嘅三文治全部做到足。
《泰晤士報》嘅飲食版編輯 Tony Turnbull 對士多啤梨忌廉三文治只係一般。一方面，佢覺得英國人可以好易接受到呢款食物，當佢好似果jam三文治、生果布甸或者英式海綿蛋糕就OK，士多啤梨忌廉三文治嘅食材同個啲食物差唔多，所以呢啲食材擺埋一齊唔會出事。
不過，Turnbull 覺得馬莎唔切走啲麵包皮好累事，當有麵包皮，個塊 2cm 厚嘅白麵包同啲忌廉喺佢個撈埋一齊會變咗成pat嘢咁，佢覺得切走麵包皮，麵包同士多啤梨/忌廉嘅比例會合理一啲。
Turnbull 話士多啤梨忌廉三文治唔掂，但佢話同枱一齊同佢試食、主要係女人嘅其他人好buy，個啲女人都好留意個包裝上面寫個啲營養資料，佢哋一睇到一份三文治只係290卡路里，只係一件蛋糕嘅一半，即刻話鍾意食。
大家或者會發覺，上面啲食評覺得馬莎推出呢款產品只係為搞gimmick，而且有啲語帶不屑。《衛報》一篇嘗試用社會文化角度講馬莎新款三文治嘅文章，或者解釋到部份原因。
《衛報》話，日本甜點近年喺英國越來越受歡迎，多咗地方賣雪糕糯米糍、抹茶餅乾呢啲食物，例如喺超市網站 Ocado 嘅網站，日式糯米糍（mochi）嘅搜尋量過去一年升咗96.2%。喺英國人眼中，日本食物（特別係和菓子）受歡迎，因為佢哋將食物外觀整得好精緻，好適合打卡，而放上網後通常又會tag個種食物名，久而久之，令越嚟越多英國人鍾意日本食物。
《衛報》引述一個食物市場顧問，佢話，啲人生活中面對好多未知之數，想喺食物之中搵到解開呢種苦惱嘅答案，佢哋想搵啲微小、開心嘅放縱，令佢哋覺得好新鮮，好似比普通事物多咗一啲啲嘢，而且文化上好滿足。
BBC 介紹士多啤梨忌廉三文治時，問咗一個終極問題：究竟乜嘢係三文治？
相傳，三文治由18世紀英國政治家、第四世三文治伯爵（Earl of Sandwich）John Montagu發明（三文治喺指佢哋家族嘅封地根地郡 Sandwich 鎮），佢想食飯時都可以玩啤牌，所以叫下人將啲肉夾喺兩塊麵包中間，可以一隻手食嘢，另一隻手拎住啲牌。
所以，英國人覺得三文治一定係鹹食，喺裏面夾啲水果同忌廉係好奇怪。
BBC 於是問：唔放鹹食喺裏面個啲，仲叫唔叫三文治？唔用一般麵包又算唔算三文治？甚至，只有一塊麵包，唔係兩塊夾住，又係唔係三文治？
BBC 舉咗唔少呢啲「好似係三文治、但又好似唔係」嘅例子，包括越式法國包三文治（Bánh mì）、法式三文治（Croque monsieur）、美國新奧爾良嘅「窮孩子牡蠣三文治」（po' boy）、澳洲喺中間夾意粉嘅意粉三文治（Spaghetti sandwich）。
BBC話，英國都有唔少外國人會問係唔係三文治嘅食物，例如中間夾住薯片嘅薯片三文治（crisp sarnies），又或者夾住熟雞肉、香料同蛋黃油醬嘅「加冕雞三文治」（coronation chicken sandwich）。
=====
如果想支持網主更新本blog、Twitter、Facebook等平台，並閱讀深度分析文章，歡迎訂閱我的Patreon，月費只是7.21美元：